Iddepem

ta kompiuter
sakbay a maiddepka
a mulmulagatan ti lubong

ast
12/8/2009

Nadutokan nga opisial ti GF, nagsapata

Nagsapata dagiti baro a kameng ti Hunta Direktiba ti GUMIL Filipinas bayat ti maikatlo a regular a board meeting ti gunglo dagiti mannurat nga Ilokano iti Filipinas ken iti ballasiw-taaw idi Nob. 29 iti Currimao, I.N.

Dagitoy a baro a direktor ti mangpunno iti pagkurkurangan ti bilang dagiti kameng ti Hunta Direktiba ti gunglo nga agtakem agingga iti 2011.

Dagiti nagsapata: Freddie G. Lazaro ti Philippine Information Agency (auditor), Rosario Bingayen ti DepEd (direktor), Avelina Camacho ti DepEd (direktor) ken 2005 PB Awardee Arsenio B. Cortez (direktor).

Sakbayna, nadutokan ni dati a News Editor ti Bannawag Eliseo B. Contillo a direktor ngem di nakadar-ay iti panagsapata.

Iti sabali a bangir, maangay ti special meeting ti gunglo inton Enero 3, 2010 a pakatamingan ti pakaangayan ti 42nd GF Convention inton Abril 9-11, 2010. (Sherma E. Benosa)

Bannawag, Disiembre 14, 2009.

Pamulinawen ti Angin

lumabas latta ti angin a di madmadlaw
agparintumeng iti pamulinawen a bingkol
a nakasursuron nga agtaraok iti agmatuon,
wenno sirokenna dagiti am-ammangaw
kadagiti kalapaw tapno tumapuakda iti bangsal
ket sumpokda iti kasipngetan sakbay a mapuoranda
iti anglem a taptapayaen ti bannawag…

ngem masaksianna: di maipangag ti kararag
iti away a nangitaleken iti riknana iti siudad
a mangkakaut met iti angesna iti rinibu a partuat
ti pamulinawen nga utek— mangipaay pay
iti sandi a biag ket agtignay iti addang
ti elektroniko a buton a pispislen ti utek met laeng:
dagitoy iti kuadrado a pagorasan, daulo ken wanwan.

ammona:
addaan ti nakaparsuaan iti bukod a wagas
a pangagas kadagiti sugatna
mangngegna:
ti danapeg dagiti pungtot a naglugan
iti kimat ken gurruod

ania ti maisungbat?

dung-aw…

maimatanganna:
ti panagkalikagum ti danum iti panagpatas
dagiti pasdek ken dagiti tangrib
kanunonganna:
ti pannakaipadaga dagiti agrupsa
ken dagiti saan a mataginayon…

narnekan iti barukongna ti maladaga:
ti anges, ti ayat a namunganay iti saklolona;
dagiti pagsasao dagiti pusoda
ti idengngepda iti pingping ti kannag,
iti takiag ken gurong ti kapanagan
kasaoda ti amian no narnekan ti lubong
ket mangngegda manen ti lallay ti daga.

ARIEL S. TABAG
Villa, Sta. Teresita
3512 Cagayan

Bannawag, Dis. 14, 2009.

Ulaw

no di aginana ti kanito,
di mapupuotan ti panangtagikua ti sipnget iti lawag;
di masaksian ti panangwaknit ti lawag iti sipnget:
maulaw ti lubong iti awan kaes-eskanna a panagpuligos...

asseng
dis 2, 2009, 4:54am

Awag

(Ken ni Mom C.)

Segseggaak ti awagmo tunggal alas tres iti malem
Nangruna ket basta lattan naputol daydi estoriam
Iti panagsupadi ti bengngat iti komedia
Dagiti i-San Esteban ken i-Candon—
Sangagasut ket uppat a Martes dayta
A linitupan dagiti katawam ti liwliwa nga ididiaya
Ti panaginana a di met ipatagikua ti kapitalista
A pagorasan ken kompiuter.

Agsisilpo ketdi dagiti rinibu nga estoriam:
A makadangran ti napalaus a panagpagus iti nasam-it
A no matnag ti nakangatngato, mabanitog
A dagiti sabsabong, para kadagiti sibibiag…

Ilastogko koma ti katibker ti kimkimpetanmi
A kararag iti pettat nga idadarup ni Ondoy.
Ay, anian a naglamiis ti dakulapna
A nangapros kadagiti dapanmi ken bukotmi!

Wenno amadek no nasaksiam ti panangiwalwallages
Ni Pepeng kadagiti saleng ken sabsabong
Nupay siertok, adda latta dagiti pakpakatawa
Nga imbati kenka ti didigra.

Kayatko ita a panunoten a pettat ti panangawis kenka
‘Tay barom idiay Canada ket ipasarabomto laengen
Ti pagawagmo koma. Wenno inawisdaka
Dagiti taga-Candon ken -San Esteban
Nga iturongmo ti komedia iti panagpiestada.
Wenno nagturista dagiti appokom
Iti nadumaduma a disso ket sika ti bagnosda.

Ta iti maudi a nangngegko a timekmo,
Kabaelam dagitoy.

Ngem nabayag unayen a dika umaw-awag

Nalabit addaka iti disso nga awan bagyo
Wenno ti panagpagus iti nasam-it,
Wenno dagiti nangangato ta agpapadan ti amin,
Ket dita met laeng makapagkinnaawatan—

Isu a segseggaam laengen ti panagkitata manen.

ARIEL S. TABAG
Intramuros, Manila

Naggibusen ti Gubat, Kabagis

ken ni Edison, OFM, itoy maika-29 a panagkasangayna nupay nasurat sumagmamano nga aldaw sakbay ti panag-28-na)

Naggibusen ti gubat, Kabagis. Luktamon ta katedral
Ta isagutko dagitoy ayat ken kappia a tinegged ti buli;
Adtoy dagiti dapo ti kampilan ken kalasag ken armalayt
Itanemko iti tukot ti altar tapno didan bumangon pay.

Sinarakusokko ti sipnget apaman a tinallikudannak
Insarangko ‘toy barukongko iti ulpit dagiti di-katatawan
Ta pudno ti kunam: di agamak dagiti kabusorko iti rosario,
Di rumukma iti agua bendita ta ganggannaetda iti Biblia.

Mabannog met ti bagi nga aguray iti balligi a di maanninawan
Wenno iti kappia nga inyadayo ti law-ang ken kinadatdatlag.
Diak maawatan a ti nakakaasi, agdir-into iti agnanayon a ragsak
Ta agpatingga laeng ti utekko iti puso, ipatpateg ken pannangan.

Saanak ketdi a nakiranget iti dangadang dagiti adipen ti boksit,
Saanak a kimmalay-at tapno balinsueken ti trianggulo
Diak inlimog ti nalabaga iti amarilio ta awan ti makabael—
Impaneknekko laeng nga adda pagpapadaan ti amin: ipapatay.

Iti tunggal maruros a luak, ininumko a nangbibineg iti kararuak;
Iti pannakapasag ti pigsak, iti dung-aw a nainaw ken naipasngayak;
Iti tunggal panagalla-alla, imbagnosnak ti sinursurotko nga agsapa;
Idi impagarupmo a binugawko ti diosmo, tinilmonko ti daga.

Naggibusen ti gubat, Kabagis. Masindian manen dagiti rungrong
A naisaluket kadagiti atep; mapunasan dagiti sinapot nga arado;
Maitukit dagiti bin-i kadagiti kinelleng a nagpanes iti ipapanaw—
Itan, sangsangalenda ken dagiti billit ti samiweng ti panagapit.

Naggibusen ti gubat, Kabagis. Luktamon ta katedral
Ta isagutko dagitoy ayat ken kappia a tineggedko iti buli;
Abrasaennak, siak a nabatbati pay a rurog iti pagbabakalan,
Sindiam nga anglem iti dangadangmo kadagiti padam a nagabito…


Ti karbengan iti panagipablaak
ket kukua ni ARIEL S. TABAG

no ti panagdaniw ket panangyala

siak ngatan ti kaaduan
iti pinutot nga alis

pr (koma) kalpasan ti ondoy ken pepeng

Dagiti Dadaulo Di Agpatpatingga
Ti Ipuspuskol Ti Rupada

...maklaatak ta blanko,
agsarsaragasag met ti rupada

no kas kadagiti dandaniw da.... dagiti sursuratek,

AGPARTIAK ITI KALDING, KALIEK 'TAY LEBBENKO A BASI

no kas kadagiti sursuraten da.... dagiti daniwko, agpakamatayak laengen

BANG!